Հեղինակ՝ Ararat | Ամսաթիվ՝ 20-03-2009 | Տպել

Վերջին ժամանակներս Ջավախքում գոյություն ունեցող հիմնախնդիրների շուրջ ակտիվացել են հասարակական-քաղաքական քննարկումները: Հայտնվել են ինչ-որ ուժերի կողմից ուղղորդվող մարդիկ, որոնք կազմակերպված ձևով փորձում են հասարակության ուշադրությունը շեղել Ջավախքում գոյություն ունեցող բուն հիմնախնդիրներից:

 

Ջավախքի հասարակական-քաղաքական կազմակերպությունները մշտապես քննարկել և բազմիցս Վրաստանի կենտրոնական իշխանությանն են ներկայացրել այն հիմնախնդիրները, որոնց լուծումից է կախված հայ ազգաբնակչության հետագա գոյատևումը Ջավախքում և հայ-վրացական բարեկամության ամրապնդումը:

 

Այս հիմնախնդիրներին են պատկանում ազգային ինքնության պահպանման, քաղաքական, հոգևոր-մշակութային, կրթական և սոցիալ-տնտեսական բնույթի հարցերը: Մասնավորապես, մեզ համար կենսական նշանակություն ունեն.

 

▪ տեղական իշխանության մարմիններին ավելի լայն լիազորություններով օժտելը,

 

▪ վրաց պետական լեզվին զուգահեռ հայոց լեզվին տարածաշրջանային լեզվի   կարգավիճակ տրամադրելը,

 

▪ մարդու և համախումբ բնակվող ազգային փոքրամասնության իրավունքների   պաշտպանությունն ապահովելը,

 

▪ վրացական իշխանությունների կողմից տարածաշրջանում ժողովրդագրական կազմի արհեստական փոփոխությանը միտված քաղաքականության բացառումը,

 

▪ Ջավախք-Հայաստան բազմակողմանի կապերը միտումնավոր խոչընդոտելու քաղաքականության բացառումը,

 

▪ տարածաշրջանի հասարակական-քաղաքական գործիչների նկատմամբ ապօրինի հետապնդումների ու հալածանքների բացառումը,

 

▪ հայ-վրացական պետական սահմանի Ջավախքի հատվածում սահմանի անցման արհեստական խոչընդոտների վերացումը,

 

▪ պետական կրթական համակարգի օպտիմալ համակարգումը հայկական ազգային կրթության հետ,

 

▪ տարածաշրջանում հայկական ազգային մշակույթի պահպանման և զարգացման միջոցառումների մշակումը և իրագործումը,

 

▪ Ջավախքում ներդրումային և հումանիտար քաղաքականությանը նպաստող օրենսդրական փաթեթի մշակումը:

 

Համոզված ենք, որ առանց այս խնդիրների լուծման, Ջավախքում կպահպանվի մշտական լարվածություն, և այդ պատճառով էլ մենք պայքարում ենք դրանց լուծման համար: Խնդիրները վերանում են դրանք լուծելով, ոչ թե դրանց բարձրացնողներին լռեցնելով:

 

Մենք համագործակցում ենք այս խնդիրները բաձրացնող և նրանց լուծմանը նպաստող բոլոր հասարակական և քաղաքական կազմակերպությունների ու անհատների հետ և պայքարելու ենք բոլոր նրանց դեմ, ովքեր փորձում են անձնական նպատակներով հասարակության ուշադրությունը շեղել դրանից:

Համոզված ենք, որ այս խնդիրների լուծման ուղղությամբ համընկնում են Հայաստանի և Վրաստանի պետական շահերը:

 

Իսկական հայ-վրացական բարեկամություն կհաստատվի միայն բարձրացրած խնդիրների լուծման արդյունքում: